Wia dr schworz Kaffäi wirkn konn
Amoul ischt a Madl vo Graun in dr Hoffnung gwäisn. Si hott in St. Moritz doubm in an Hotel gorbatat. Vours Kind afft Welt kemman ischt, ischt si hoam kemman. Di Graunr, diasa gsäichn houbm, houbm schnell vrschtontn, wous dou lous ischt.
S Beitl, wia ma oana koaßn hott, dia ollm olla Nuikaitn gwißt hott und dia aa pon Brunn ollz schnell vrbroatat hott, hott deismoul nou gour ett ollz gwißt. Si ischt schnell zun Brunn um Wossr gongan und hott gsogg: „Hopps kärt, hopps gsäichn, wißts eis nicht, vo weim wäarts denn sain, moanscht, äir tuatsa hairatn, wou wäarn si denn untrkemman, hottr eppas, daßsi z läibm houbm, wenn schnell schun drai oudr viari sain, wia wäartsi denn zu dein kemman sain?“
„Miar wissn olla nicht“, houbm di oana Waibrlait gsogg. „Dou muaßi gäan frougn. Haint honni äi po dr Nochbrin eppas z tian, norr gäi an Schprung ouni. S oan Wort gibs ondr, norr wäari schun draufkemman. I drzeil enk nochr ollz, wous i drfrogg hon.“
Si ischt norr zuandr gongan.
„Jo, iatz soug mr decht, wäir ischt denn dr glickla Voutr?“
„Mai guata Nochbrin, diar tati jo ollz sougn, waili woaß, daßas po diar blaib. I honn amoul inna Bar an schworza Kaffäi trunkn. Es konn lai von sella kemman sain, sischt wissati gour ett, vo wousas kemman kannt. I woaß gour ett, wia miar assou eppas konn passiarn. I honn jo nia mit niamat nicht kött.“
„Jo, sell wäarscht ett sougn, deis honni aa nou nia käart. Iatz muaßi schnell gäan zu dr Trina sougn, daßsi soll toul schworzn Kaffäi trinkn, wail si schun assou long affan Kind wortat.“